15 November 2013
VS-Inspektoraat Klagtes
SAPD
Bloemfontein
Geagte Kolonel van Rensburg
UITERS SWAK OPTREDE VAN SAPD STEYNSRUS – RONDLOPER BEESTE
Vir omtrent drie maande word ek en die inwoners van
Steynsrus geterroriseer deur rondloper beeste vanaf ons plaaslike lokasie.
Draadheinings word platgetrap en tuine word vernietig. My heining is nou reeds
drie keer platgetrap. Hierby fotos van ‘n paar heinings asook van die beeste.
Terwyl ons duisende rande se skade ly en die SAPD duisende
kere gevra is om ons te help, het ons feitlik geen reaksie vanaf die SAPD gekry
nie. Inwoners wat die SAPD skakel se oproepe word summier geignoreer. Waar daar
wel op ‘n oproep gereageer word, word die publiek uiters onbeskof behandel en
word daar geen hulp aangebied nie. Wat het van die SAPD se missie geword dat
almal se eiendom beskerm moet word??
Ek het een van die beeste wat my heining beskadig het se
brandmerk bekom en dit aan die SAPD voorsien soos hulle voorgestel het. Na ‘n
week is daar nog geen poging aangewend om
die eienaar se besonderhede op te spoor nie. Dit het my net
5 minute geneem om die eienaar se besonderhede by die Veediefstaleenheid te
kry. Het die SAPD lede nie geweet hoe nie of was dit weereens net laksheid aan
hulle kant? Ek het die eienaar van die beeste se besonderhede aan die SAPD
voorsien soos hulle voorgestel het met die verstandhouding dat hulle die eienaar
sal inbring sodat ons die skades met die eienaar kon bespreek. Vir drie weke
lank het ek feitlik elke dag met lede van die SAPD geskakel om te verneem
wanneer die eienaar nou ingebring gaan word. Geen reaksie nie! Ek het na die
drie weke met kolonel Shieling van Kroonstad geskakel en die situasie
verduidelik. Daar was dadelik ‘n voertuig met ‘n beampte vanaf Kroonstad
gestuur om die SAPD lede van Steynsrus ‘n bietjie wakker te maak. Hierdie
beampte het ook twee lede van Steynsrus na my gebring en hy het hulle duidelik
laat verstaan dat hulle dadelik die eienaar van die beeste moet gaan haal sodat
die aangeleentheid bespreek kan word. Binne ‘n uur was die eienaar by my huis.
Hoekom was dit nodig dat iemand van Kroonstad hierheen moes kom voordat
Steynsrus se beamptes kon reageer. Die wakkermaak het nie lank gehou nie,
omtrent net vir drie ure.
Op Dinsdag 15 Oktober het daar ‘n bees deur die drade van ‘n
privaat koshuis oorkant my huis deurgebreek. Die kinders wat oppad skool toe
was het histeries begin raak toe die bees, ‘n groot swart bul, al hoe nader aan
hulle beweeg. Ek het ook die indruk gekry dat die bul die kinders gaan bestorm.
Dieselfde bul was verskeie kere op my erf en het ook op ons afgestorm. Ek het
die SAPD geskakel en konstabel Mokadsane en nog twee vroulike beamptes het
opgedaag. Sonder om eers moeite te doen om uit die voertuig te klim, deel
Mokadsane my mee, baie onbeskof maar ten minste baie eerlik, dat hy nie weet
wat om in so situasie met ‘n bees te doen nie. Wat egter baie erg was toe een
van die vroulike beamptes op my skreeu dat ons nou moet ophou met ons klagtes
oor die beeste en dat dit ons eie skuld is dat die beeste ons heinings breek
omrede ons ons hekke oop los. (Jammer maar my IK laat my nie toe om hierdie
redenasie te verstaan nie) Hierdie bewering is egter snert omdat ons reeds ons
hekke toe hou om die beeste uit ons erwe te hou. Verder beweer sy toe dat dit
onmoontlik is vir ‘n bees om ‘n draadheining te breek. Dat so ‘n astrante
konstabeltjie op so vieslike onbeskofte wyse haar onkunde moet ten toon stel!
Terwyl die vrou nog praat, kom die os wat in die koshuisgronde was, trap die
draad plat en stap doodluiters uit. Toe ek die beampte daarop wys wat so pas
gebeur het met die os en die draad, ruk sy haar op net soos ‘n skoolkind en
maak sy haar venster toe dat ek nie verder met haar kan praat nie. Wat ‘n
verleentheid moet hierdie konstabel vir die SAPD wees! Mokadsane het toe
dadelik weggery. Na sowat ‘n halfuur skakel ek vir Mokadsane by die stasie en
vra hom wat die betrokke vroulike beampte se naam is. Hierop deel Mokadsane my
mee dat haar naam niks met my te doen het nie. Ek het gesê dat ek ‘n klagte
teen haar wil indien waarop Mokadsane my meedeel haar naam is “Confidential
Information”. Nogal ‘n seldsame naam vir ‘n dame maar as ‘n lid van die SAPD sê
dit is haar naam dan glo ek dit. Dit het nie eers een keer by my opgekom dat
Mokadsane dalk kon verwys het na “Vertroulike Inligting” nie, wie sal nou so
iets sê terwyl almal naamplaadjies dra! Is sy belangriker as die
Staatspresident, almal mag weet wat is sy naam!
Behalwe vir die skade wat die beeste reeds aangerig het, het
ons geen gebruik meer van ons erwe nie. Tuinslange word stukkend getrap,
beddings en plante en vrugtebome word vernietig. Daar is mense, soos myself,
wat groente plant en van daardie groente afhanklik is. Die plantseisoen is so
te sê verby wat beteken daar gaan glad nie hierdie jaar geplant word nie. Die
beeste het ek talle maal in die dag en ook in die nag uit my erf gejaag. Maar
ons as publiek word nie deur die SAPD gehelp nie. Ten minste kan die SAPD probeer om die eienaars van die
beeste op te spoor of selfs die beeste uit die dorp te verjaag. Baie van die
beeste se brandmerke is onleesbaar of het hoegenaamd geen brandmerk nie. Kan hierdie beeste nie
geskiet word nie? Hoe anders moet ons eiendomme beskerm word? Dwing die SAPD
ons om wet in eie hande te neem omdat hulle waarkynlik te laks is om die
publiek by te staan? Geen wonder baie mense begin dink aan Ureum nie.
Om met die
stasiebevelvoerder te praat is hopeloos. Soos ‘n lid van die publiek tereg
opmerk is dat daar meer reaksie van ‘n baksteen verkry word as jy daarmee praat
as wat daar ‘n reaksie by die stasiebevelvoerder verkry word as daar oor die
beeste gepraat word. Dit laat my wonder hoeveel van hierdie rondloper beeste
behoort aan SAPD lede, is dit dalk hoekom hulle so laks is om die publiek by te
staan met hierdie probleem?
Hoekom kan
die SAPD in Steynsrus maar nie net hulle werk behoorlik doen nie, dan sal dit
nie nodig wees om die SAPD te Kroonstad te nader vir hulp nie en sal die
Inspektoraat se tyd ook nie so gemors word met al die klagtes nie.
Die uwe
O R de Scally
