29 Julie 2013
VS-Inspektoraat Klagtes
SAPD
Bloemfontein
Geagte Kolonel van Rensburg
UITERS SWAK OPTREDE VAN SAPD STEYNSRUS
In opvolg van my epos gedateer 25 Julie 2013 is dit vir my
skokkend om te bevestig dat tot op hierdie oomblik was daar nog geen reaksie
vanaf die SAPD in Steynsrus nie. Duidelik besef die polisie nie die erns van
hierdie misdaad nie of die algemene intellektuelevlak laat dit nie toe dat die
polisie tot hierdie besef kom nie.
Wanda du Plessis was ‘n ooggetuie van die inbraak by my
huis. Sy was net toevallig in die straat. Op geen wyse het sy die inbreker
gekonfronteer nie. Nogtans het hy haar summier aangeval en die wyse waarop hy
haar aangeval het laat by my geen twyfel dat hy haar wou vermoor nie. Noudat hy
nie met die moord kon slaag nie maak dit Wanda du Plessis nou ‘n ooggetuie nie
net van die inbraak nie maar ook van poging tot moord. Nou het hierdie
krimineel nog meer rede om Wanda du Plessis te vermoor.
Hierdie aanvaller is waarskynlik ‘n ou geharde krimineel wat
moontlik al voorheen gemoor het en wat ook besef dat iemand wat hom kan uitken hom weer in die tronk kan laat beland. Die laaste paar maande was
daar ‘n vlaag van brutale rooftogte in Steynsrus. Indien hierdie aanvaller ook
verbind word met die vorige rooftogte, kan
ek waarborg dat Wanda du Plessis se lewe kritiek in gevaar is. Aangesien die
inbreker in my motorhuis ingebreek het terwyl my motor daar was, sal hy
natuurlik die motor herken wat beteken dat Wanda du Plessis se dogter en myself
ook nou in gevaar is. Wanda en haar dogter lewer twee maal per week
gemeenskapsdiens in die plaaslike lokasie en u kan besef dat dit hulle nou ‘n oop teiken is
vir hierdie krimineel.
Tans lewe Wanda, haar dogter Petro Beukman en myself in
vrees. Ons weet nie wanneer die aanvaller saam met van sy trawante in die dag
of nag gaan terugkeer na die huis om sy halfvoltooide werk te kom afhandel nie.
Wanner ons na die winkels moet gaan doen ons dit in vrees dat ons en die motor
herken kan
word. Wanda en Petro sal die gemeenskapsdiens in die lokasie vir tyd en wyl
moet stop, dit sal ‘n selfmoordsending wees om hulle twee nou die lokasie te
laat binne gaan. Danksy die slegtigheid van die polisie sal hierdie situasie
dalk vir ‘n onbepaalde tydperk moet voortgaan wat moontlik ‘n uitwerking op
hulle werke kan
hê.
Dit is nou reeds ‘n week na die aanval en nog steeds is daar
geen ondersoek gedoen nie, geen verklaring is afgeneem nie, geen saaknommer is
toegeken nie en na my wete is hierdie voorvalle op geen rekord van die polisie
nie. Dit beteken natuurlik dat daar geensins na die krimineel gesoek word nie,
dit ten spyte daarvan dat Wanda persoonlik die saak by die stasie aangemeld het
slegs minute na die aanval. Die twee beamptes wat die perseel uiteindelik
besoek het gee ‘n nuwe betekenis aan die woorde treurigheid en belangeloosheid.
Die beamptes het nie eers uit die voertuig geklim om te sien waar die inbraak
of die aanval plaasgevind het nie. Ek het persoonlik waargeneem dat die
beamptes met ‘n absolute traak-my-nie agtige houding na Wanda geluister het oor
die gebeure en toe hulle daar wegry kon mens dit duidelik agterkom hulle gaan
geen moeite doen om na enige iemand te soek nie. Met inagneming van die erns
van die voorvalle en die feit dat daar nou drie mense vrees vir hulle lewens, kan die optrede van
hierdie beamptes net beskou word as laks en nalatig OF dit was growwe rasisme
aan die kant van die polisie. ‘n Ondersoek na hierdie twee beamptes se
laakbaregedrag en ‘n tugverhoor met ‘n skorsing sal verwelkom word. Almal in
Steynsrus en ons plaaslike lokasie kla oor die ignorering en patetiese optrede
van die polisie. Almal is dit eens dat dit ‘n mors van tyd is om met enige saak
na die polisie te gaan. Waarvoor het ons ‘n polisiestasie? Wat maak die
beamptes in die mag as hulle te sleg is om hulle werk te doen? Dit is lankal
tyd dat daar ‘n hoë profiel ondersoek gedoen word na die werksaamhede van
hierdie stasie in die algemeen.
Die gebeure en sienswyses word nie gedramatiseer nie. Daar
is ‘n algemene gevoel onder lede van die publiek dat die polisie in Steynsrus
nie hulle werk doen nie. Dit is verstaanbaar want dit gebeur gereeld dat daar
niemand by die stasie is wat die publiek kan
bystaan nie en as ek reg kan
onthou het u ‘n klompie maande gelede persoonlik dieselfde ervaring by hierdie
stasie ondervind. Die situasie hier is verstaanbaar. Die stasiebevelvoerder is
bittermin op kantoor en daar is dus niemand wat die vinger op die pols kan hou nie. Gevolglik
word daar op ‘n daaglikse basis amptelike voertuie by winkels gevind en waar
beamptes besig is met hulle inkopies. Verder bedryf die polisie hier ‘n
pendeldiens tussen die dorp en die lokasie. Soms word die voertuie so oorlaai
met passasiers dat die agterste deure nie eers kan toemaak nie. In beginsel is daar nie ‘n
probleem met die gedagte dat passasiers vervoer word as deel van ‘n
gemeenskapsdiens wat gelewer word nie. Maar wat word gedoen as die voertuig
geradio word in ‘n krisis? Word die passasiers eers by hulle bestemming
afgelaai voordat hulle op die oproep reageer?
Aangesien die polisie na ‘n week nog nie ‘n vinger gelig het
om die saak te ondersoek nie, stel ek dit derhalwe op rekord dat indien enige
van Wanda du Plessis, Petro Beukman of myself deur hierdie krimineel op enige
wyse aangeval, beseer of gedood word en indien daar by my huis deur hierdie
krimineel ingebreek word of indien Wanda of Petro enigsins benadeel gaan word
in hulle werke omrede hulle nie meer gemeenskapsdiens kan lewer nie, sal die
polisie ten volle daarvoor verantwoordelik gehou word en sal daar nie geskroom
word om ‘n regsaksie teen die polisie in te stel nie.
Die uwe
O R de Scally